სარკისებური ნეირონების როლი გაყიდვებში

იყიდე მეტი ხათუნა მდინარაძე

სარკისებური ნეირონების როლი გაყიდვებში

1920 1080 buymore.ge

უჩვენეთ ბავშვს ენა და ისიც მაშინვე ენას გამოგიყოფთ. როცა ჩურჩულით მოგვმართავენ, ჩვენც ჩუმადვე ვპასუხობთ.  როგორ გგონიათ, რასთან გვაქვს ამ დროს საქმე?! ან რა კავშირშია ეს ყველაფერი გაყიდვებთან ?!

1992 წელს იტალიელმა ნეირობიოლოგმა, პარმის უნივერსიტეტის პროფესორმა ჯაკომო რიზოლატიმ (Giacomo Rizzolatti) და მისმა კოლეგებმა  მაკაკებზე ჩატარებული ექსპერიმენტების დროს სრულიად შემთხვევით, ე.წ. “სარკისებრი ნეირონები” აღმოაჩინეს.  რიზოლატის ექსპერიმენტები აჩვენებდნენ მანამდე უცნობ მოვლენას:  გარკვეული წყება  ნეირონებისა აქტივირდებოდნენ  მაშინ,  როდესაც  მაკაკები  ხედავდნენ,  როგორ  ჭამდა ექსპერიმენტატორი  არაქისს. პარადოქსი კი იმაში მდგომარეობდა, რომ თავად  მაკაკების  მიერ  არაქისის  ჭამის  დროსაც ზუსტად იგივე ნეირონები აქტივირდებოდნენ.

2004 წელს კი კომპანია Apple-ის გენერალურმა დირექტორმა  სტივ ჯობსმა ნიუ-იორკში, მედისონ-ავენიუზე სეირნობისას უჩვეულო რამ შენიშნა: ადამიანებს ქათქათა თეთრი ყურსასმენები ეკეთათ (მაშინ როდესაც, იმხანად ყურსასმენების უმეტესობა მოსაწყენი შავი ფერის იყო) – ზოგს ყურებში ჰქონდა გარჭობილი, ზოგს კისერზე ეკიდა და ზოგსაც კი  ზურგჩანთიდან მოუჩანდა. „მგონი, ყველა გზაჯვარედინზე ვხედავდი თეთრ ყურსასმენებს და სწორედ მაშინ გავიფიქრე, ღმერთო, როგორც იქნა, აღსრულდა-მეთქი“, – იხსენებდა ჯობსი. ის, რაც მან დაინახა, სხვა არაფერი იყო, თუ არა ტვინის იმ მონაკვეთის გამარჯვება, რომელიც ე.წ. სარკისებურ ნეირონებთანაა დაკავშირებული.

 ნეირომარკეტინგი, მარტინ ლინდსტრომის განმარტებით, “მარკეტინგისა და ნეირომეცნიერების ქორწინებაა”. ეს გახლავთ იმ ცნების გასაღები, რასაც მარტინი Buyologyს უწოდებს. ნეირომარკეტინგი სწვდება ადამიანის (ამ შემთხვევაში, მომხმარებლის) დაფარულ ფიქრებს, ემოციებს, გრძნობებსა და სურვილებს.   მისი დახმარებით გასაგები  ხდება იმ გადაწყვეტილებების მოტივი, რასაც ადამიანები ყოველდღიურად იღებენ პროდუქტის ან კონკრეტული ბრენდის შეძენის პროცესში.

ყიდვის გადაწყვეტილების პროცესში პირველხარისხოვანია ხატების ენა, ანუ ვიზუალური ეფექტი. ასევე, აღსანიშნავია, რომ „მიბაძვის“ კონცეფცია მნიშვნელოვანი ფაქტორია ყიდვასთან დაკავშირებული გადაწყვეტილების მიღებისას. მაგალითად, წარმოიდგინეთ, რომ ხართ სავაჭრო ცენტრში და ჩაუარეთ რომელიმე ძვირადღირებული ან ბრენდული ტანსაცმლის მაღაზიას, ვიტრინაში კი მოჩანს მოხდენილი, ტანადი და ლამაზი მანეკენი, რომელსაც აცვია საზაფხულო ფერებში შემკული საცურაო კოსტიუმი თავისი ფარფატა შარფით.

  რას აკეთებს ამ დროს თქვენი ტვინი და სარკისებური ნეირონები? – მიუხედავად იმისა, რომ შესაძლოა არ ჯდებოდეთ მანეკენისა თუ  „იდეალური“ ქალის პარამეტრებში, მაინც გეფიქრებათ შემდეგი რამ :  „ამას თუ ვიყიდი, მეც ასეთივე ვიქნები და ასევე მომიხდება“, ან ხათრით დიეტაზეც კი დადგებით . შედიხართ მაღაზიაში და 15-20 წუთში გამოდიხართ საცურაო კოსტიუმით, საზაფხულო შარფითა და ამავე დროს, სხვა დამატებითი პროდუქტებით, რაც ზღვასთან და რუჯთანაა  დაკავშირებული. შენაძენმა ასევე სოციალური სტატუსიც დაგიკმაყოფილათ  ხოლო  დოფამინმა  – გაგაბედნიერათ.

 გილოცავთ, თქვენმა სარკისებურმა ნეირონებმა და მიბაძვის კონცეფციამ თქვენ და თქვენნაირი გემოვნებიანი ქალბატონები, მყიდველებად გაქციათ! 

მიუხედავად იმისა, რომ ნეირომარკეტინგი ახალგაზრდა მეცნიერული დარგია, გაყიდვების სფეროში ბევრ საინტერესო სიახლესა და ძვრებს გვპირდება.

რუბრიკას წარმოგიდგენთ

გაყიდვების სახლი დამფუძნებელი და  ბიზნეს ტრენერი ხათუნა მდინარაძე

გაყევით ლინკდინზე  : Khatuna Mdinaradze