fbpx

როდის დგება რებრენდინგის დრო  და რა შემთხვევაშია ის წარმატებული?  

ციფრული ბიზნეს ჟურნალი

როდის დგება რებრენდინგის დრო  და რა შემთხვევაშია ის წარმატებული?  

1260 709 buymore.ge

,,ცხოვრება ველოსიპედის ტარებას ჰგავს. ბალანსი, რომ შეინარჩუნოთ, საჭიროა განაგრძოთ მოძრაობა!” – ალბერტ აინშტაინის ეს რჩევა არა მხოლოდ ცხოვრებისეული, არამედ ბიზნესისეულიცაა. ბიზნესის სფეროში მუდმივი მოძრაობა და მოქმედება გჭირდება, რათა იყო კონკურენტუნარიანი და წამყვან პოზიციასაც იკავებდე ბაზარზე.

თანამედროვე ბიზნეს სამყარო სამი პარამეტრით ხასიათდება: სისწრაფე, კონკურენცია და პროგრესი. კონკურენციის ზრდის ფონზე, კომპანიები მუდმივად ისწრაფვიან ცვლილებების და სიახლეებისკენ, რათა კონკურენტების ჩრდილში არ აღმოჩნდნენ.

ზოგჯერ დგება მომენტი, როცა კომპანია ნერგავს სიახლეებს, თუმცა სასურველ შედეგს მაინც  ვერ იღებს? – ასეთ დროს დღის წესრიგში დგება რებრენდინგის – ანუ კომპანიის არსებული ბრენდის და იდეოლოგიის ახლით შეცვლის აუცილებლობა.

რებრენდინგი, ეს არის უკვე არსებული ბრენდის შეცვლა და ახალი იმიჯის შექმნა, მისი ეფექტიანობის გასაზრდელად. რებრენდინგი ხელს უწყობს კომპანიის პროდუქციაზე მოთხოვნის გაზრდას. მთავარი რებრენდინგში არის მყიდველს შეუქმნა ახალი წარმოდგენა კომპანიაზე.

ახალი იმიჯის შექმნა არ არის მარტივი საქმე. ამისთვის უნდა არსებობდეს წინაპირობა. რებრენდინგის აუცილებლობა მაშინ დგება, როცა სამუშაო მეთოდები მოძველდა და ისე ეფექტურად აღარ მუშაობს, როგორც წინა წლებში. ასევე, როცა საჭიროა არსებული სეგმენტის ცვლილებები, როდესაც თქვენი, როგორც ბრენდის დაპირება აღარ მუშაობს, შეცვლილია მომხმარებლის მოთხოვნა და თქვენი პროდუქტი ან მომსახურება უბრალოდ აღარ იყიდება.

როცა, რებრენდინგზე ვსაუბრობთ, აუცილებელია იმის გათვალისწინება, რომ ის მხოლოდ ლოგოს, სლოგანის ან კომპანიის ფერების შეცვლა არ არის. ის, მთლიანად იმ წესების გარდაქმნაა, რომელსაც კომპანია კლიენტთან მუშაობისას იყენებს. ამიტომ, როცა რებრენდინგს ვაკეთებთ, აუცილებელია რამდენიმე წესის დაცვა, რადგან მას ყოველთვის არ აქვს წარმატებული შედეგი.

საწყის ეტაპზე აუცილებელია კომპანიის უკვე არსებული ბრენდის ანალიზი, რათა დაადგინო, ნამდვილად სჭირდება თუ არა ფირმას რებრენდინგი. ჩასატარებელი სამუშაოების აუდიტი 6 ეტაპისგან შედგება.

  1. უნდა შეფასდეს კომპანიის ბრენდის ძლიერი და სუსტი მხარეები. პასუხი უნდა გაეცეს კითხვებს, რას აკეთებს ფირმა ძლიერი მხარეების გაუმჯობესების და განვითარებისთვის და რას აკეთებს იმისთვის, რომ სუსტი მხარეები გამოასწოროს და აქციოს ძლიერ მხარეებად.
  2. არსებული ბაზრის შეფასება და ანალიზი – სამომავლოდ, რამდენად გაართმევს თავს კომპანია, ახალ პროდუქციაზე გადაწყობის პროცესს და ეფექტურად უპასუხებს ბაზრის გამოწვევებს.
  3. მომხმარებლის ინტერესების კვლევა – აუცილებელია, შეისწავლოთ იმ ადამიანების ქცევა, მოლოდინი, აღქმა, ვისთვისაც გათვლილოა თქვენი პროდუქტი. გამოიკვლიეთ, რა სჭირდება მომხმარებელს, რა უნდა მას. რადგან ისტორიაში არის შემთხვევები, როცა მომხმარებლის მოთხოვნების კვლევის არ ჩატარებას კომპანია გაუკოტრებია.
  4. კომპანიის შესაძლებლობების შეფასება – აუცილებელია იმის დადგენაც, რა რაოდენობის რესურსის ჩადება შეუძლია ფირმას რებრენდინგში.
  5. ჩატარებული მოკვლევის პროცესის ანალიზი – ფირმა აჯამებს ყველა განხორციელებულ კვლევას და იღებს საბოლოო გადაწყვეტილებას, თუ რა მიმართულებით სჭირდება რებრენდინგი. ირჩევს ატრიბუტებს, რომლის მეშვეობითაც დაიწყებს კომპანიის განახლებას, იქნება ეს: ახალი ლოგო , ფირმის ფერები, სლოგანი თუ ახალი მომსახურებები.
  6. საბოლოო პროდუქტის საზოგადოებისთვის გაცნობა – ეს რებრენდინგის დროს ყველაზე მნიშვნელოვანი ფაზაა, რადგან ყველა არსებული თუ მომავალი კლიენტები, მომხმარებლები სრულად იყვნენ ინფორმირებულები ფირმაში მიმდინარე ყველა ცვლილებაზე. თუ ბოლო ეტაპი წარმატებით ჩაივლის  ეს ნიშნავს, რომ რებრენდიგი წარმატებით ჩატარდა.

რებრენდინგის ხშირი მომხმარებელია ყველასთვის ცნობილი საკვები ობიექტი McDonald’s, რომლის რეპუტაციაზეც საკმაოდ ცუდი გავლენა მოახდინა ისეთმა დოკუმენტებმა, რომლებიც სწრაფი კვების ობიექტებს “სიმსუქნის ეპიდემიაში” ადანაშაულებდნენ. ამ ფაქტმა ძალიან შეამცირა მათი გაყიდვების რაოდენობა, რის გამოც McDonald’s-მა რებრენდინგის პროცესი დაიწყო.  მან მომხმარებელს შესთავაზა სალათები და სუფთა, ნატურალური პროდუქციით დამზადებული საკვები.

1990-იანი წლების დასაწყისში Apple-ის კომპანიის გაყიდვები და მომხმარებლია ინტერესები პროდუქტის მიმართ, საკმაოდ დაბალი იყო. მაგრამ, ყველაფერი შეიცვალა, როდესაც სტივ ჯობსმა 1997 წელს კომპანიას რებრენდინგის პროცესი დააწყებინა. მან შემოიტანა თანამედროვეობა Apple-ის დიზაინში და შეძლო ბრენდის აღორძინება.

ქართულ რეალობაში კი, წარმატებული რებრენდინგის მაგალითია საყოფაცხოვრებო ელექტრო ტექნიკის ყველაზე დიდი ქსელის, Elit Electronics-ის რებრენდინგი, რომელმაც რებრენდინგი პირველად განახორციელა 23 წლიანი არსებობის ისტორიაში სააგენტო HOLMES & WATSON-თან თანამშრომლობით. შეიცვალა ბრენდის ლოგო, მასში შევიდა გრაფიკული ფორმები, რომელიც დიზაინის თანამედროვე ტრენდებს ეხმიანება და რაც ყველაზე მთავარია, ტიპოგრაფიის ერთი ნაწილი “ELIT” მეორე ნახევართან “ELECTRONICS”-თან შედარებით, მონუმენტური გახდა, რადგან ბრენდი მთავარ აქცენტს საკუთარი პროდუქციისა და სერვისის ექსკლუზიურობაზე აკეთებს. კომპანიისთვის პრიორიტეტია, ქვეყანაში ტექნოლოგოური განვითარება და პროგრესი, ამიტომ მთავარი მესიჯი გახდა: ,,იყურე წინ.“  ელექტრონიქსის რებრენდინგმა კომპანიის გაყიდვები და მომხმარებელთა რიცხვი საგრძნობლად გაზარდა.

სწორად დაგეგმილი რებრენდინგის შემთხვევაში, კლიენტები ახლებურად შეხედავენ კომპანიას, დაინტერესდებიან ფირმის როგორც შინაგანი, ისე გარეგნული ცვლილებებით. ასერომ, ხანმოკლე მარკეტინგი იზიდავს კლიენტების ყურადღებას, ხანგრძლივი კი, შესაძლებლობას აძლევს  კომპანიას ბაზარზე  დამკვიდროს ახალი და წარმატებული იმიჯი.

ასე რომ იარეთ წინ

ეთო ბიქოშვილი